Ou se lle apagou a luz ao Consello de Ministros presidido polo titular do Executivo español, Pedro Sánchez no momento de decidir sobre a aplicación de medidas tendentes a reducir os danos que causa a inflación que azouta ás familias españolas, ou non se explica que entre os produtos alimentarios aos que o Goberno aplicará medidas paliativas que tentan corrixir a devandita inflación non figuren os produtos do mar. Debe ser porque a guerra en Ucraína non afecta aos produtos mariños cuxo consumo tanto recomendan sanitarios e nutricionistas para ben da humanidade e beneficio dun sector que as está a pasar canutas por algo tan simple como é o prezo do combustible dos barcos e os seguros destes e os seus tripulantes. Está claro que que no equipo do Goberno non hai un só mariñeiro ou armador e que o salario dos responsables ministeriais e da presidencia do Goberno da para pagar o peixe que todos eles podan consumir nas súas casas (cando xantan nelas e non en restaurantes).
O sesto paquete de medidas tendentes a paliar os efectos económicos da xa citada inflación alimentaria non contempla a aplicación dun IVE superreducido ao 4% dos produtos do mar que reclaman insistentemente os representantes do sector e os consumidores, malia ser conscientes os gobernantes de que tal redución sería un paso decisivo no obxectivo de incentivar o consumo de peixe e o efecto que este consumo en aumento tería nun sector que esmorece. Ao mesmo tempo, o beneficio de tal redución na tendencia negativa que experimentan os prezos da cesta da compra.
Que non se recoñeza o beneficio da relación entre o IVE superreducido e o consumo dun produto alimentario de primeira calidade como é o peixe, resulta chamativo e inentendible a todas luces, porque os produtos mariños levan en sí mesmos o marchamo de alimento básico na mesma medida que o teñen recoñecido os que conforman a listaxe dos que sí merecen a atención gobernativa na aplicación do IVE reducido: pan, fariña, leite, queixo, óvos, froita, verdura, hortalizas, legumes, cereais, pastas ou aceite.
A redución deste imposto é temporal pero vai permitir que ata finais do mes de xuño se pague menos por estes alimentos. Mais non o peixe que, probablemente, a xuizo do Consello de Ministros debe ser un artigo de luxo.-
Inexplicable.
