O Concello de Rianxo con fondos propios está a impulsar a colocación dun tramo da rede de abastecemento municipal no Araño entre A Casilla e Pousada. Para evitar actuacións posteriores está aproveitando as actuais obras de instalación das beirarrúas impulsadas pola Xunta na Ac 305 para instalar xa a tubaxe de suministro que se conectará coa rede xeral. Será un novo paso para dar continuidade ao servizo de abastecemento desde a zona de Outeiro en Taragoña e no que restará para a súa conclusión apenas 200 metros para a ligazón completa. Un tramo que se prevé realizar a continuación, nos vindeiros meses.
Anticipando tamén o futuro saneamento da aldea de Pousada, esta intervención contempla tamén unhas arquetas que darán saída aos sumidoiros aos que se enganchará a rede xeral nas obras de saneamento da aldea. Esta obra, saneamento de Pousada, forma parte do Plan Único da Deputación e prevese licitar nunhas semanas. Contará cun orzamento de 222.000 euros.
