O Concello de Boiro, a través do departamento de Servizos Sociais que dirixe Raul Treus, investiu un total de 111.083,33 euros do Plan Único Concellos (POS) da Deputación da Coruña para gastos sociais extraordinarios. O importe total destinouse a financiar persoal técnico, axudas de emerxencia, ampliación do servizo de axuda a domicilio, conciliación e respiro familiar e adquisición de equipamento técnico.
Segundo explican dende Servizos Sociais, nos anos anteriores estes fondos axudaron a contribuír á recuperación económica, social e da saúde das familias con axudas directas destinadas a co-financiar pagos ou servizos pero, neste ano, destinouse a cantidade provincial a axudar tamén dende o punto de vista da saúde mental e física. “Gracias a esta contribución provincial puidemos chegar a máis de 50 persoas con algún dos servizos financiados mediante este programa”, recoñeceu Raúl Treus.
Así, reforzouse a área coa contratación de psicólogos e persoal técnico que, ata final de ano, continúan atendendo a algo máis de 30 persoas mediante o servizo de psicoloxía de adultos e infantil-xuvenil. “Estamos moi contentos do traballo feito e de que, gracias a esta asignación, puidésemos chegar á poboación con algo tan importante como é a saúde mental”, afirmou o concelleiro, engadindo que foron destinados algo máis de 12.000 euros para programas de axudas de respiro familiar, para persoas e familias con persoas dependentes ao seu cargo; e uns 6.000 euros foron destinados a financiar medidas de carácter extraordinario como o pago de alugueiros, luz e gas en casos de extrema urxencia, tratamentos dentais non cubertos polo sistema público e outras compras como poden ser lentes.
Mediante esta achega provincial o Concello de Boiro adquiriu tamén 5 novas grúas que, en calidade de préstamo, se ceden a familias con persoas dependentes e que precisan deses medios técnicos. “Dende o departamento de Servizos Sociais seguimos a traballar para impulsar programas para o conxunto da cidadanía e atender as necesidades latentes”, afirmou o concelleiro.
