O Centro Cultural Lustres Rivas acolleu o pasado xoves 22 de decembro a presentación de dous libros da man do VI Ciclo da Universidade de Santiago, titulados La filosofía hoy. Necesidad de las humanidades en la construcción del mundo del futuro (baixo a coordinación de Marcelino Agís, Javier Barcia e Rocío Carolo), e Caminos del pensamiento japonés, (coordinado por Marcelino Agís, Javier Barcia e Alba Iglesias).
A primeira das obras é un título que nos dá pistas sobre o contido da obra: todos os filósofos que escriben nel describen como están a filosofía e as humanidades nunha sociedade tecnolóxica, dixital, unha sociedade de redes, pero tamén do coñecemento.
Polo que respecta a Caminos del pensamiento japonés ofrécenos un espazo de diálogo entre autores xaponeses, galegos e do resto da xeografía española, cun obxectivo común: a unión dos pobos a través dos principais camiños de peregrinación, como é o Camiño de Santiago.
A presentación contou ademais de coa concelleira de Educación Juana Brión cun nutrido público, especialmente alumnado do curso do IV Ciclo da USC que se desenvolve na súa sede de Ribeira.
