Un millón e medio de euros recibirá o faro da illa de Sálvora dos fondos Next Generation, cos que se financiará un proxecto de rexeneración ambiental da contorna e posta en valor impulsado por Turismo de Galicia.
O consello de administración da Autoridade Portuaria de Vilagarcía deu o visto e prace á firma do convenio co ente autonómico para a execución das melloras, ás que se destinarán preto dun millón e medio de euros.
Dentro do Plan de Recuperación, Transformación e Resiliencia enmárcase o proxecto, que inclúe unha serie de actuacións coas que se quere dotar ao faro de Sálvora duns usos complementarios ao propio de sinal marítimo, para adecualo aos cambios tecnolóxicos e operativos nos sinais marítimos e emendar a deterioración material polo paso do tempo. A iniciativa enmarcase no Plan Xacobeo Next Generation para a posta en valor dos bens de interese cultural do Camiño de Santiago, no que se inclúe o proxecto para Sálvora e no que se enmarca a posta en valor do edificio desde o punto de vista turístico, á apertura do inmoble aos visitantes e a divulgación científica.
