O de sempre: O Goberno aplaude os acordos acadados no Consello de Ministros de Pesca da UE, o sector pesqueiro español critica os mesmos e anuncia depezamento de barcos e Galicia ve negativo o devandito acordo que, na práctica, non supón avance algún a respecto da proposta inicial da Comisión Europea.
Que cousa é a que fai que exista tal disparidade de criterios en torno a un asunto tan doado de entender como é a pesca?.
Para o ministro de Agricultura e Pesca, Luis Planas, España acadou un “bo resultado” para a frota e a frota afonda na súa problemática incrementada esta e agora polos acordos adoptados na maratoniana xuntanza de 22 horas realizada sen esconxuros en Bruxelas. A Xunta de Galicia non albisca avances significativos e lamenta que as negociacións da delegación española e o Executivo comunitario non desen maiores froitos. Javier Garat, secretario xeral de Cepesca e presidente de Europêche cualifica de “agridoce” o resultado: só se negociaron 26 stocks dos que 18 afectan a España e o que se reduce non ten compensación co que se incrementa. O maior dano é para a frota do cerco debido ao acordo sobre o xurelo.
Os avances son escasos, por non dicir mínimos: o aprobado ven ser, na práctica, o que xa figuraba no punto de partida da Comisión , algo que se daba por feito en tanto en canto ese punto de partida baseábase nas recomendacións dos científicos. Non tivo en conta a opinión do sector e os aspectos económico e social bailaban o cha cha cha sen rubor algún: o xurelo do Cantábrico e Gran Sol ten fixada unha cota de 3,000 toneladas para España, o que significa unha redución do 80% na zona 8c ao non se permitir a pesca dirixida e que para a frota galega é un canonazo perfectamente dirixido á súa liña de frotación. Polo tanto, menos lobos, Carapuchiña, cando se fala de “bo resultado” para España porque se Galicia é a efectos da pesca o 50% do que esta significa para o conxunto nacional, non pode ser que Galicia perda e España gañe.
“España acadou aumentar as capturas e limitar o recurte de días de esforzó pesqueiro”, é un dos valores importantes deste Consello de Ministros comunitarios, na opinión do ministro Planas, para quen “España mellora as posicións iniciais no Mediterráneo e revirte o recurte dos días de pesca (do 7% ao 3,5%) sempre e cando a frota adopte medidas que melloren a selectividade, con redes que tamén melloren o paso de alevíns, ou acatar unha veda de catro semanas consecutivas.
Iso sí, España votou en contra destas propostas por unha “discrepancia de fondo” que, obviamente, nada tiña que ver cos vetos á pesca de fondo nos caladoiros comunitarios.
Hai unha lixeira mellora nas capturas de pescada, peixe sapo e o rapante de augas ibéricas. E a Cooperativa de Armadores de Vigo (ARVI) considera satisfatorio o resultado do Consello de Ministros para a frota do Gran Sol e fala de prexuizo para a frota de cerco polas medidas tomadas en relación ao xurelo. Acepta a posibilidade de xestionar as pesqueiras con TAC e cotas plurianuais dado que si esta se aplica correctamente outorgaría á frota maior tranquilidade nas súas previsións pesqueiras.
E rematou o conto de mil mentiras que nos contaban os nosos pais cando eramos cativos.
