O Concello de Ribeira vén de sacar a licitación os traballos para renovar a liña de auga para consumo e a instalación de pluviais na localidade da Ameixida, situada dentro da parroquia de Castiñeiras. Trátase dunha intervención cuxo orzamento ascende a 107.627 euros, IVE incluído, e que está enmarcada no Plan Provincial de Cooperación ás Obras e Servizos de Competencia Municipal (POS+ 2022),
Segundo informa o Concello, o obxectivo é “mellorar o servizo de abastecemento de auga potábel na zona indicada; ademais de instalar unha rede para drenaxe de pluviais”. Para alcanzalo vanse substituír as tubaxes existentes deterioradas por unha de PVC de alta densidade e 160 mm. de diámetro na marxe dereita; outra de polietileno de alta densidade de 0,75 mm. de diámetro, na marxe esquerda; e unha última de PVC 0 125 mm de diámetro, nun cruce, para o cal será necesario a instalación de maquinaria para perforación horizontal dirixida.
No relativo á rede de pluviais, dispoñerase pola beirarrúa da marxe dereita da estrada un colector de PVC corrugado SN-8 de 315 mm e construiranse arquetas sumidoiro e pozos de rexistro de formigón prefabricado.
Os pavimentos de ambas as marxes da estrada serán renovados, cunha sub-base de saburra e unha capa de acabado de mestura bituminosa en quente. As beirarrúas repoñeranse co mesmo pavimento (baldosa hidráulica).
As empresas interesadas dispoñen ata o 3 de xaneiro de 2023 para presentar as súas ofertas a través do Sistema de Licitación Electrónica da Xunta de Galicia.
