O Concello de Ribeira e Asociación Galega para a Axuda dos Enfermos con Demencia tipo Alzhéimer (AGADEA) veñen de asinar un convenio de colaboración para a creación dunha aula de estimulación integral en Aguiño. A rúbrica, estampada polo alcalde Manuel Ruiz e pola presidenta da asociación, Isabel Gey, tivo lugar na nova Aula do Maior que se abriu este outono na localidade a carón do Conservatorio da parroquia. Segundo os termos do acordo, o Concello comprométese a poñer a disposición as instalacións dous días á semana (martes e xoves de 15.00 a 19.00 horas).
Isabel Gey subliñou que o obxectivo desta iniciativa é “seguir estendendo centros terapéuticos que dean atención a persoas con alzhéimer e outras enfermidades dexenerativas nas súas etapas iniciais”. A actividade comeza este xoves 15 cun pequeno grupo de sete persoas que se prevé vaia incrementándose á medida que os veciños da zona coñezan a existencia deste novo servizo.
Pola súa parte, Manuel Ruiz recordou que o Concello leva moitos anos colaborando estreitamente con AGADEA, e significou que a apertura desta nova aula en Aguiño prosegue con outras accións como o Centro de Día de Ribeira ou a aula aberta no edificio da confraría. “Todo aquilo no que podemos seguir colaborando ímolo facer”, declarou.
