O Concello de Dodro entregará este sábado, 10 de decembro, o XXXV Premio de Poesía Eusebio
Lorenzo Baleirón á poeta lucense Brenda Mondelo pola súa obra “Neve”. Dito certame, que rende
homenaxe ao poeta Eusebio Lorenzo Baleirón e que constitúe un referente da escena literaria e da
creación lírica en lingua galega, está dotado con 2.500 € e supón a publicación da obra galardoada
nunha editorial de recoñecido prestixio.
A celebración do acto terá lugar ás 17.30 horas no CPI de Dodro e reunirá á familia e veciñanza do
poeta local, autoridades do goberno municipal, así como a representantes da comunidade escolar e
do mundo literario.
O evento estará conducido pola coordinadora do certame, a poeta Elvira Ribeiro Tobío, e presidido
polo alcalde do Concello de Dodro, Francisco Xabier Castro Tourís, o concelleiro de Cultura e
Patrimonio, Xoán Xosé Vicente Franco, e o presidente da Fundación Rosalía de Castro, Anxo Angueira
Viturro. No marco do mesmo presentarase a exposición “EUsebio” creada polo alumnado do CPI e
entregarase “Mini Premio Eusebio Lorenzo Baleirón: concurso literario “das viaxes e dos soños”,
certame que ten como obxecto a promoción da creación literaria, do uso da lingua galega e da
creación artística entre a mocidade. A celebración estará amenizada pola actuación musical de
Iolanda Eiras e Narci Rodríguez.
