Este ano as Brigadas Deseucaliptizadoras volven ao seu lugar de orixe: a aldea de Froxán, en Lousame. Farano para a tradicional Roga de San Silvestre, na que as persoas integrantes do colectivo ambiental volverán apostar polo bosque nativo a través dunha nova plantación de frondosas autóctonas (cereixeiras, castiñeiros, aveleiras e nogueiras).
En concreto, plantarán especies autóctonas en dúas parcelas que xa foron deseucaliptizadas previamente polas Brigadas, esmagando ou descascando puntualmente algúns rebrotes. Trátase de parcelas con acordos de custodia do territorio coa Fundación Montescola. Os traballos volven contar cos apoios do proxecto Life Terra, que colabora coa adquisición de plantas (3.000 árbores), e coa Deputación da Coruña, que posibilitou un importante investimento en equipos de protección, maquinaria e ferramenta.
Pola tarde continuarase cos obradoiros de formación para brigadistas nunha parcería co Centro de Estudos Eurorexionais Galiza | Norte de Portugal (CEER), Montescola e À Escuta, apoiada polo Erasmus+. Os obradoiros versarán sobre temáticas diversas centradas no ámbito de traballo das Brigadas (técnicas de eliminación de exóticas e invasoras, seguridade e protección en traballos forestais, mecánica e mantemento de maquinaria forestal, gobernanza e conservación comunitaria, educación ambiental, etc.).
As e os brigadistas participantes recibirán un certificado do Centro de Saberes para a Sustentabilidade, recoñecido oficialmente pola Universidade das Nacións Unidas.
As Brigadas
As Brigadas Desucaliptizadoras son unha iniciativa da Asociación Ecoloxista Verdegaia que teñen como obxectivo mobilizar, organizar e coordinar persoas de todo o país con vontade de botarse ao monte para realizar accións de voluntariado ambiental en colaboración coas titulares de terreos con valores ambientais degradados ou ameazados pola eucaliptización e outras especies exóticas invasoras.
Fano mediante a erradicación destas especies e a súa substitución por outras autóctonas de alto valor ecosistémico. As accións das Brigadas teñen como obxectivo que “as zonas intervidas non volvan ser pasto do lume” e que “sirvan como zonas protectoras, actuando como cortalumes verdes e corredores de biodiversidade”.
