A Asociación Ambar das persoas con diversidade funcional promoveu unhas xornadas de convivencia cos alumnos e alumnas de 4o de ESO do IES Leliadoura. Estas tiveron lugar nesta semana, os días mércores 14 e xoves 15, nas instalacións do Centro de Recursos da asociación.
As xornadas estiveron enmarcadas nas accións que se realizaron dende a Asociación Ambar polo Día Internacional das Persoas con Diversidade Funcional e o Día Mundial dos Dereitos Humanos.
Durante a súa visita, o alumnado puido coñecer máis a fondo os distintos obradoiros ocupacionas que se levan a cabo en Ambar, así como a misión que ten a asociación como axente promotor da igualdade de oportunidades e os valores cos que se traballan a prol dunha comunidade máis inclusiva.
A través desta iniciativa, as persoas usuarias de Ambar e o alumnado do IES Leliadoura puideron coñecerse e desfrutar das distintas actividades que se levan a cabo dentro das instalacións do centro.
