A Sala Arcos Moldes do Auditorio de Rianxo vai acoller este mes de decembro a versión teatral da novela Os nenos de varíola, de María Solar, un dos grandes fitos da nosa literatura xuvenil recente. A representación virá da man da compañía Pérez & Fernández. Será o venres 9 de decembro ás 21.00 horas. A función está recomendada para un público maior de 8 anos. A entrada é de balde ata completar capacidade, poden retirarse dende unha hora antes na billeteira do Auditorio.A proposta forma parte da segunda edición do Circuíto de Igualdade da Deputación da Coruña.
A versión teatral de Os nenos da varíola é un proxecto escénico de divulgación científica, memoria histórica e de posta en valor dunha muller pioneira esquecida pola historia: Isabel Zendal. Nace nunha familia pobre de solemnidade, nunha aldea do concello de Ordes. Emigra á Coruña onde, sendo nai solteira, traballará de reitora na Casa de Expósitos. En novembro de 1803, como parte do equipo médico da Real Expedición Filantrópica da Vacina, emprende unha viaxe transoceánica de catro anos, que lle dará o creto de ser a primeira enfermeira da historia en misión internacional de saúde pública. Coidaba do único elo imprescindible da REFV: os expósitos que, de brazo a brazo, levaron a América e Asia a primeira vacina coñecida (a da varíola).