A Marea Cidadá de Noia, durante as labores de fiscalización ao Goberno municipal, fíxose eco de dúas facturas que alcanzan os 7.260€ dunha aplicación móbil que, segundo sostén a agrupación, “carece de utilidade para a veciñanza” e, de feito, “só tiña a día 16/12/2022 dez descargas, das que cinco son integrantes da Marea de Noia”.
Segundo engaden, esta aplicación “simplemente publica o mesmo que a rede social Facebook propiedade do Concello de Noia” e “ademais leva en funcionamento dende o 25 de marzo do ano 202, sen que nin sequera sexa publicitada polo Goberno local”.
Dende a Marea indican que “pedimos varios orzamentos sobre unha ferramenta móbil de prestación similares a empresas do sector e o maior dos orzamentos non chega a 2.000€”.
A Marea anunciou que solicitará á intervención municipal que “exerza o control sobre esas facturas, xa que consideran que o gasto está por riba do valor de mercado”. Indican tamén que “as actualizacións son copias e pegas da información que escribe o persoal de confianza da alcaldía nas redes sociais”.
