O Concello de Dodro compartiu os detalles da nova edición (2022-2023) das Escolas Deportivas Municipais, que teñen aberto o prazo de inscrición a partir deste martes 13 de decembro (até o 9 de xaneiro) e que inclúen actividades para crianzas e persoas maiores. Porén, o Concello fai saber que o prazo de inscrición no ximnasio municipal é continuo e está aberto todo o ano.
As actividades para nenas e nenos son as seguintes: psicomotricidade, multideporte, patinaxe, baile deportivo, iniciación ao fútbol (CD Dodro) e Judo (ANPA de Dodro). Para a rapazada de máis de 15 anos o programa inclúe ximnasia de mantemento, pilates, zumba e jumping fitness. E para maiores de 65 anos e con mobilidade reducida a axenda vén con cursos de psicomotricidade e tonificación. As Escolas Deportivas de Dodro son organizadas polo Concello e terán o seu centro de operacións no Pavillón Polideportivo Municipal, coa colaboración da ANPA de Dodro, a Deputación da Coruña e o Club Deportivo Dodro.
