Noia acolleu este luns 28 a visita do delegado da Xunta na Coruña, Gonzalo Trenor, quen visitou os establecementos beneficiarios da orde de axudas do programa EMEGA de apoio ao emprendemento e ao emprego feminino que apoiará na comarca do Barbanza a creación de 19 novos postos de traballo cun investimento de máis de 137.000 euros. Trenor estivo acompañado na súa estadía en Noia polo alcalde Santiago Freire a concelleira de Comercio e Deportes, Laura Salgado.
Segundo fixo saber o delegado, a convocatoria deste ano para este programa contou cun “orzamento histórico” de case 4,4 millóns de euros (un 34% máis que o ano pasado), co que a Xunta prevé outorgar 275 axudas, un 18% máis que en 2021, no que se concederon 234.
Ademais, dixo, “o crédito da convocatoria experimentou na anualidade 2022 un incremento significativo, co obxectivo de ofrecer o maior volume de recursos para favorecer a iniciativa empresarial das mulleres e brindarlles maiores oportunidades para diminuír as fendas de xénero”.
O programa EMEGA comprende axudas dirixidas a apoiar a posta en marcha, a mellora e a activación de iniciativas empresariais constituídas por mulleres. Tamén medidas complementarias para favorecer a conciliación da vida persoal, familiar e laboral, así como o acceso a servizos específicos de información, asesoramento e orientación empresarial co obxecto de facilitar a implantación e consolidación dos proxectos.
A contía dos apoios vai dos 8.000 euros por beneficiaria aos 42.000 en función da liña solicitada e do número de postos de traballo creados ou mantidos para mulleres de carácter indefinido. A estas contías engadiríase, de ser o caso, a axuda complementaria da liña Concilia, que oscila entre os 3.000 e os 5.000 euros.
Para resultar beneficiarias de EMEGA, as mulleres emprendedoras teñen que liderar unha microempresa ou pequena empresa validamente constituída e domiciliada en Galicia. Entre outros requisitos, deben manter vinculación laboral co proxecto que, á súa vez, ten que ser viable económica, técnica e financeiramente.
O pasado 2021 o programa permitiu apoiar a cifra de 234 iniciativas empresariais de mulleres e a creación de 272 novos postos (158 por conta propia e 114 por conta allea) de mulleres, así como o mantemento doutros 240.
