O Concello de Ribeira celebra este 25-N (Día Internacional para a Eliminación da Violencia Contra as Mulleres) con varias actividades na xornada deste venres. Farao cun acto institucional que inclúe diferentes actividades e que ten o seu epicentro na praza do Concello. A axenda comeza ás 10.30 coa recepción dos centros educativos participantes na xornada anti-violencia, e prosegue ás 10.45 coa lectura dun manifesto institucional por parte do alcalde, Manuel Ruiz, dando paso ás actividades nas que participan os escolares. Ás 12.00 horas está prevista unha performance coa soprano noiesa Esperanza Mara. Participarán alumnas e alumnos de terceiro da ESO e de FP Básica. Os actos están abertos á cidadanía en xeral.
