O Concello de Noia informou do remate das obras para mellorar o parque infantil de San Lázaro, que, segundo fan saber fontes do Consistorio, “xa loce dun novo aspecto máis renovado e acolledor tras os traballos realizados nas instalación”.
O investimento foi de máis de 48.000 euros e estivo financiado pola Dirección Xeral de administración Local, Vicepresidencia da Xunta de Galicia e o Concello de Noia.
As obras contemplaron a instalación da cuberta, a renovación da soleira, a aplicación de caucho anti-impacto na zona de xogo, así como a renovación e pintado da valla perimetral e das atraccións. Ademais, en vindeiras fases está previsto que siga mellorando o parque.
Tras a apertura, o alcalde de Noia, Santiago Freire, manifestou que “a veciñanza e as familias xa poden gozar dun espazo de xogo en San Lázaro máis seguro e acolledor”.
