Presentadas oito ofertas para a materialización do espazo de deportes urbanos de Fontán (Ribeira)

O Concello de Ribeira informou do remate do período de presentación de ofertas para a construción do seu novo Espazo Deportivo Urbano, na zona de Fontán. En total, foron oito as propostas achegadas (houbo unha novena que resultou excluída pola mesa de contratación) presentadas durante a licitación. Trátase dunha iniciativa destinada a satisfacer a demanda en determinadas especialidades especialmente demandadas pola xuventude como o skate, o bmx, o roller e o scooter.

A nova infraestrutura, de 432 metros cadrados de superficie, emprazarase sobre unha parcela municipal de 480 metros cadrados situada en Fontán, a 200 metros do paseo do Touro e na contorna da nova Comisaría e do novo Punto de Encontro Familiar.

O proxecto foi redactado por Daniel Yábar, prestixioso arquitecto alacantino especializado neste tipo de instalacións, responsábel de actuacións como o Skatepark de Santa Lucía en Vitoria, a Skateplaza de Logroño, o Skatepark Parque de la Granja en Tenerife ou o Bowl Vía Hispanidad de Zaragoza.

O Concello explicou que o proxecto inclúe a construción dun skatepark in situ a base de formigón gunitado cunha zona de rúa e outra de rampla que estará integrada na paisaxe. O futuro espazo de deportes e cultura urbana será un espazo inclusivo e disporá de diversos elementos como unha pirámide, unha duna, un hip, unminiramp ou un corner.

Completarán a intervención a colocación de papeleiras, bancos, aparcabicis e instalación das columnas e proxectores.

O orzamento base de licitación é de 150.409,50 euros e o prazo de execución de tres meses.