Os viños da nosa comarca, co-protagonistas do Fórum de Barcelona da man da Deputación

A Deputación de Coruña está a visualizar o potencial turístico, enolóxico e culinario da provincia durante as tres xornadas do Fórum Grastonómic de Barcelona. O deputado de turismo e vicepresidente da entidade provincial Xosé Regueira definiu deste xeito a campaña desenvolvida no Fórum: “Estamos seguros que a alianza e o compromiso entre a promoción turística e o territorio vai dar grandes resultados e que imos conseguir que moita xente volva mirar para as potencialidades do rural e, mesmo, que se aposte máis por iniciativas concibidas con parámetros de sustentabilidade e de economía circular”.

Baixo o selo A provincia que sabe, nesta segunda xornada, o programa de cociña en directo iniciouse co showcooking de Lolo Mosteiro e Paula Martínez do restaurante A artesa da moza crecha de Betanzos, que utilizaron nas súas receitas produtos da Reserva da Biosfera das Mariñas Coruñesas e Terras do Mandeo.

Os showcookings deste martes tamén inclúen cociñeiros do terriotorio de Ortegal como Óscar Galandum da Taberna Bardancas de Cariño e Antonio Díaz Calvo do Gastrofood AUTGA de Cabanas.

“Os viños da Coruña son seguramente os máis descoñecidos de Galiza” asegura o sumiller Alberto Varela, quen engade “pero A Coruña ten unha relación histórica co viño moi estreita e máis ampla”.

Alberto Varela é o encargado de explicar no stand provincial a historia dos viños da provincia que se remonta “ao século XII, cando Betanzos e o Ribeiro eran as dúas zonas de máis prestixio en canto a calidade dos viños de toda Galiza e, ademais, daquela o viño galego saía todo polo porto da Coruña cara ao País Vasco, Navarra, Asturias e Inglaterra”.

Ademais de contextualizar os viños que se serven con cada showcooking, tamén ofrece unha cata na que deu a coñecer os tintos Xeixelo da IXP Betanzos, Vulpes Vulpes de A Pobra do Caramiñal (IXP Barbanza e Iria), Cazapitas de Rianxo, e o tinto mencía Ribeiras de Armea de IXP Betanzos. “Os viños da Coruña caracterízanse por unha caste moi pouco coñecida que é o branco lexítimo, por unha caste de carácter atlántico, polas súas notas máis cítricas e más frescas e por unha acidez ben entendida”. Ademais da IXP Betanzos, Alberto Varela tamén explicou que “na zona de Rianxo e A Pobra do Caramiñal o branco lexítimo ten mestura con albariño e cunha variedade moi pouco coñecida que é moi típica desa zona que se chama “ratiño”, que é uva moi pequeniña e moi pouco agradábel á vista pero que acabou facendo grandes viños”. “O viño de Coruña ten moitas historias que contar e incluso moi descoñecidas para a xente da Coruña” asegurou.