O Concello da Pobra lembra que as vivendas da vila que se vistan de Nadal dispoñen ata o día 2 de decembro para se anotaren no Concurso de Embelecemento de Balcóns e Fachadas. A Concellaría da Promoción Económica, da cal é titular a edil Charo Varela (Nós Pobra), aposta polo terceiro ano consecutivo por este certame que busca, nas súas palabras, “incentivar participación da veciñanza na decoración exterior dos seus fogares nunhas datas tan sinaladas”.
Establécese un premio por parroquia consistente nunha gran cesta do Nadal con produto local.
Para anotarse habilítanse as seguintes vías: o correo electrónico turismoecomerciodapobra@gmail.com ou o contacto 981843280, marcando a extensión 2035. Deberase indica-lo nome, o documento de identidade da persoa participante, o enderezo do domicilio e un número de teléfono. Unha vez formalizada a matrícula e engalanadas as vivendas, remitirase polo referido correo electrónico un mínimo de dúas fotografías.
A ornamentación deberá permanecer dende o día 6 de decembro ao 6 de xaneiro, ambos inclusive. A temática terá relación directa co Nadal e os elementos para empregar déixanse á libre elección.
No 23 de decembro darase a coñece-lo ditame do xurado. As bases completas están ao dispor na web municipal www.apobra.gal.
