Dende o Concello de Boiro dan conta este martes 29 de novembro da nova edición do Programa Integrado de Emprego para o ano 2022/2023. O dito programa formativo levarase a cabo co apoio da Pobra do Caramiñal e está encamiñado a 100 mulleres desempregadas, sendo subvencionado pola Consellería de Emprego e Igualdade da Xunta de Galicia. Na presentación participaron: o concelleiro de Promoción Económica de Boiro, Carlos Muñiz; e a concelleira de Servizos Sociais e Desenvolvemento Local da Pobra, Amparo Cerecedo; acompañados dos técnicos.
Ao programa poderán acceder 100 mulleres demandantes de emprego dos municipios de Boiro, A Pobra, Rianxo e Ribeira, durante os 12 meses nos que se vai desenvolver o programa van recibir formación específica e tamén xornadas formativas destinadas a mellorar as súas habilidades de cara á empregabilidade e inserción laboral.
O curso inclúe formación en fundamentos básicos de cociña, limpeza, elaboración de pezas cárnicas, operacións básicas de caixa e atención ao cliente, carretilla elevadora, xestión de almacén, plan de mercadotecnia (marketing), comercio electrónico, mercadotecnia en liña, contabilidade e nóminas, Office, manipulador de alimentos, inglés…
Asemade, este programa conta cun servizo de medidas de conciliación para facilitar a asistencia ás actividades, apostando polas novas tecnoloxías para reducir a presencialidade, adaptación horaria, flexibilidade e adaptación segundo as necesidades das usuarias.
As interesadas en participar neste programa deben inscribirse como demandantes de emprego na Oficina de Emprego e solicitar a asignación do código 930.
Para máis información escribir ao enderezo electrónico: emprego@boiro.gal ou chamar aos números de teléfono: 650 042 409 e 659 247 963.
