Miguel Álvarez.- O Rotogal Boiro Voleibol visita pasadomañá (ás 19.00 horas) ao Conectabalear Manacor. Sobre o choque en terras baleares, o técnico Emilio Palacio sinala que “para nós, o máis preocupante é que nos custa moito empezar os partidos, sobre todo os primeiros sets. Despois, volvemos entrar no partido o terceiro set, cando o rival reláxase un pouco.
Hai que tentar corrixir este aspecto e saír en Manacor coa máxima intensidade”.
Sobre o Conectabalear Manacor, Emilio Palacio indica que “cambiou bastante con respecto ao ano pasado. Do mesmo xeito que nós, tivo algún problema con algún xogador estranxeiro e, cando o incorpore, será un equipo diferente. Están a empezar a rodarse e veremos como acaban a tempada”.
O Rotogal Boiro Voleibol contará pasadomañá coa baixa de Martín Casais, que se recupera dunha lesión no xeonllo, e coa dúbida de Alan Davila, que concluíu o adestramento vespertino de onte cunha sobrecarga muscular. Sobre a chegada de reforzos para citas vindeiras, Emilio Palacio afirma que “estamos a mirar xogadores, falando con eles. É complicado a estas alturas de tempada, pero estamos a tentalo. Para nós é fundamental o tema económico; temos moitos atrasos nas cobranzas. Pero, se é posible, esperamos incorporar a alguén para o próximo partido”.
