Dodro reivindica o 25-N con contacontos, cinema, actos institucionais e unha andaina

O Concello de Dodro preparou unha completa listaxe de actividades ao abeiro do 25-N, Día Internacional pola Eliminación da Violencia contra as Mulleres, que vén con diferentes propostas para nenas, nenos e maiores.

Para comezar, o Goberno local adheriuse novamente á campaña De Fronte da Deputación da Coruña, colaboración que este 18 de novembro colleu corpo coa colocación de pancartas de Dodro en Negro Contra as Violencias.

Ademais, os días 22 e 24 deste mes (martes e xoves) están programadas dúas sesións do contacontos Boneca de Lucas na CRA. A maiores, este mércores 23 actuará Cris de Caldas na Escola Infantil de Dodro e máis no Centro de Dia, e na mesma xornada celebrarase unha saíde de cinema para crianzas de 7 a 12 anos (ás 17.00 dende o Consistorio, para asistir en Vilagarcía á proxección de Reyes contra Santa).

O 25 de novembro, día grande das celebracións, levarase a cabo un acto institucional contra a violencia de xénero que incluirá a representación da peza teatral As do Mare (a cargo das narradoras Rilo & Penadique) no CPI Eusebio Lorenzo Baleirón, ás 19.00 horas.

O Concello tamén organizará ao día seguinte sábado 26, a cuarta edición da Andaina Contra a Violencia de Xénero polas Brañas.