Brenda González Fernández, coñecida literariamente como Brenda Mondelo, obtén coa obra
titulada “Neve” o XXXV Premio de Poesía Lorenzo Baleirón, convocado polo Concello de Dodro.
Así o decidiu por unanimidade o xurado, composto polas poetas Inmaculada López Silva, Emma Pedreira e Rebeca Baceiredo, logo de valorar os cincuenta e un poemarios candidatos,
salientando de Neve “a orixinalidade do tema proposto, así como do seu tratamento. Trátase,
ademais, dunha aposta non exenta de risco na busca de poetizar a narratividade. Por outra parte, a pesar de ter dous protagonistas recoñecidos, consegue romper os clixés históricos arredor destas dúas figuras que constitúen o eixo principal do libro”.
Brenda Mondelo nace o 17 de decembro de 1994 no Seixo (Pedrafita do Cebreiro) e estuda no CPI Poeta Uxío Novoneyra do Courel ata os seis anos. No 2001 marcha vivir canda os seus avós a Lugo, cidade na que cursará estudos ata finalizar bacharelato. Xa con dezasete anos,
establecerase en Madrid e aló graduarase en xornalismo e ciencia política. En todos eses anos,
sempre que se afastou do fogar, tivo a necesidade de escribir sobre el e as persoas que poboaron un mundo que nalgúns intres creu perder, pero que loitou por recuperar a través da poesía. A súa traxectoria literaria conta cos premios: Certame de poesía Xoán Díaz e Certame (Re) inventando a Xela Arias, organizados polo Concello de Cambre. En marzo deste ano, publicou o seu primeiro poemario “O espello de Celia” en Medulia Editorial.
O Premio de Poesía Eusebio Lorenzo Baleirón ademais de honrar ao excepcional poeta de Dodro e contribuir á promoción da poesía galega, constitúe unha oportunidade única na que novos valores da lírica galega, como Brenda Mondelo, acadan o apoio e recoñecemento público do seus traballos.
O acto oficial de entrega do XXXV Premio de Poesía Eusebio Lorenzo Baleirón terá lugar o vindeiro, 10 de decembro, no CPI de Dodro. “Neve” de Brenda Mondelo será publicada no ano 2023, nunha editorial de recoñecido prestixio.
