O Concello de Boiro celebra o vindeiro domingo día 4 de decembro a XVII carreira popular Mar de Boiro. 15º memorial a Pepe Buceta. Na presentación da proba, que tivo lugar esta mañá, estiveron o alcalde, José Ramón Romero; a concelleira de Deportes, Dores Torrado; o membro de Barbantia Roda, Jose Navarro; e o técnico de deportes, Manuel González.
A proba, que forma parte do circuíto de carreiras de Barbanza Arousa, está incluída no calendario oficial da Federación Galega de Atletismo e consta de tres categorías distintas. A primeira delas engloba as carreira Mini e Supermini para idades de ata os 7 anos, será de 200 metros e sairá ás 10.40 horas da rúa peonil. A seguinte categoría será para escolares, unha carreira de 2.500 metros que sairá ás 11.05 horas da rúa Principal; e a carreira longa de 10.000 metros para categorías xerais sairá ás 11.00 horas da rúa Principal.
O alcalde de Boiro, José Ramón Romero, animou á veciñanza a participar nesta proba que “está dedicada a Pepe Buceta, un referente do atletismo do noso municipio”. “Boiro é un referente deportivo en moitas
modalidades, o atletismo é unha delas, algo que se demostra nesta carreira”, engadiu o mandatario.
O percorrido da carreira será pola rúa Principal e percorrerá a Avenida de Compostela dirección Praia Xardín, percorrerá o paseo Marítimo de Barraña ata o Saltiño e chegará ata Mañóns para regresar a Boiro, onde estará instalada a liña de meta na rúa Peonil. Os trofeos premiarán aos tres primeiros clasificados de cada categoría e aos tres gañadores absolutos, tanto masculino como feminino, e tamén aos tes primeiros corredores e tres primeiras corredoras de Boiro; ao participante de maior idade e a clasificación de Sapatilla Inclusiva para persoas con discapacidade.
“A carreira popular Mar de Boiro é unhas das probas máis destacables do Concello”, afirmou a concelleira de Deportes, Dores Torrado, que agradeceu a súa colaboración a Barbantia Roda e a todos os colaboradores. “Probas como esta facilitan o achegamento de pequenos e maiores a un deporte como
o atletismo, engadiu a concelleira.
Neste momento hai inscritas xa arredor de 450 persoas e as inscricións para participar nesta proba están abertas ata o día 1 de decembro ás 23.59 horas na web de Emesports ( www.emesports.es ).
