A compañía Berrobambán iniciou en setembro, no concello de Mañón, a segunda temporada de Facer Memoria, un proxecto escénico e participativo que conta co apoio da área de Cultura da Deputación da Coruña e que proseguirá a súa xira por Teo, Carballo e (esta semana que comeza o 7 de novembro) Outes. En palabras dos responsábeis da compañía, en Facer Memoria esváense “os límites entre escenario e patio de butacas, de xeito que se lle brinda voz ao público para contar no teatro as súas lembranzas”. A iniciativa é conducida pola dramaturga e narradora oral Paula Carballeira baixo a dirección de Chiqui Pereira. Segundo anunciaron, tamén terá formato podcast, ou sexa, de arquivo sonoro dispoñíbel online.
O proxecto parte da tradición oral, “da creación comunitaria e da descuberta colectiva”, para desenvolver “un proceso teatral que desemboca nun encontro-espectáculo no auditorio municipal de cada concello no que a veciñanza participante intervirá sobre as táboas”, sinalouse na presentación, engadíndose que os seus obxectivos principais pasan por “coñecer a historia dos lugares que habitamos e a nosa contorna directa, recuperar a memoria oral, conservar a lingua e dar valor á memoria individual como paso previo para reconstruír a memoria colectiva”.
A primeira parada desta nova etapa de Facer Memoria desenvolveuse nas parroquias de Grañas do Sor e Bares de Mañón. Xa en outubro, no marco da programación do Festival Internacional Outono de Teatro (FIOT Carballo), Facer Memoria pivotou entre as parroquias carballesas de Oza e Verdillo. En novembro, Berrobambán visita os lugares de Cando e San Lourenzo, no concello de Outes, na semana do 7 ao 13. E por último, despedirá a súa segunda edición coa súa incursión en Teo, nas parroquias de Oza e máis dos Tilos, entre o 21 e o 27 de novembro.
En Outes, o calendario será o seguinte: este xoves 10, ás 19.00 h, Berrobambán reunirase coa veciñanza no Centro Sociocultural de Cando. Ao día seguinte, o venres 11, ás 20 h, o encontro darase no Local Social As Canliñas, en San Lourenzo, grazas á colaboración da Asociación de Veciños Sueiro. O centro de ensino que participará en Facer Memoria será o IES Poeta Añón, onde a rapazada se atopará con Berrobambán este xoves 10. A actuación final, que lle porá o ramo á experiencia deste proxecto no municipio, celebrase este sábado 12 de novembro ás 20.00 h na Casa da Cultura de Outes.
Escena e podcast
O proxecto desenvolve ao longo dunha semana un completo programa de accións e actividades que inclúe entrevistas individuais con veciños e veciñas que queiran compartir as súas experiencias vitais, xuntanzas abertas nos centros sociais de cada parroquia, reunións con escolares que teñan traballado na aula a recuperación da memoria local e, finalmente, un encontro-espectáculo no que participen as persoas entrevistas.
Como novidade nesta segunda edición, Facer Memoria tamén espalla o seu eido de acción ao son e a imaxe, xa que todas as entrevistas serán gravadas. Con este material, desenvolverase unha peza sonora, en formato de podcast, na que se recollen algunhas das historias contadas pola veciñanza para ampliar a súa difusión. Ademais, artellarase unha peza audiovisual a xeito de resumo da actividade de Facer Memoria en cada un dos concellos.
