A Asociación Cultura Barbantia compartiu con nós a súa axenda literaria para esta fin de semana, concretamente para os días 11 e 12 de novembro (venres e sábado). Haberá presentacións editoriais en Ribeira e Rianxo e unha homenaxe en Noia: o tributo que lle rende a xente da cultura da nosa comarca ao escritor, poeta e articulista Maxi Olariaga, falecido en 2018. Olariaga foi homenaxeado en 2016 pola propia Asociación Barbantia, que lle concedeu ao premio Sereo pola súa importante traxectoria cultural. Ao día seguinte, a poeta lucense afincada en Rianxo, Helena Villar Janeiro, presentará na súa terra de adopción o seu novo libro, De rosa antiga. Previamente, o venres, o ribeirense Xosé Antón Parada dará a coñecer a publicación da tradución ao galego do histórico Código de Hammurabi, feita por el mesmo.
- Venres, 11 de novembro, 20.30 h, Centro Cultural Lustres Rivas de Ribeira: Código de Hammurabi e outras compilacións legais de procedencia babilónica. Tradución, introdución e notas de Xosé Antón Parada.
- SÁBADO, 12 de novembro, 19.30 h, Casino de Noia, Homenaxe a Maxi Olariaga
- SÁBADO, 12 de novembro, 20.30 h, Salón de Actos do Centro Sociocultural-Auditorio de Rianxo: De rosa antiga, de Helena Villar Janeiro.
