O Concello de Noia deu un novo paso en materia de seguridade viaria. Desta volta, fíxoo na aldea de O Vilar, na parroquia de Boa, onde se están a levar a cabo labores de acondicionamento e de pavimentado nos accesos ao dito núcleo, desde a estrada AC-550. Os traballos, dotados cun orzamento de 89.473,39 €, inclúen a reparación das fochancas e a regularización do pavimento actual no cal se atopan diversos puntos que “presentan un estado de conservación deficiente”, explicou o Concello.
Para pórlle solución a esta problemática, aplicarase unha capa de 5 centímetros de aglomerado asfáltico; efectuarase o recrecido das actuais tapas de rexistro e das grellas do sumidoiro e finalmente procederase ao pintado da sinalización horizontal da vía.
O alcalde Santiago Freire visitou a zona onde se está a traballar e sinalou o compromiso do Goberno local “por ofrecerlle as mellores condicións viarias á nosa veciñanza” e inciden na importancia deste tipo de actuacións para “promover unha mobilidade máis segura e eficiente”.
