Aberto o prazo de propostas para o programa Boirenses Viaxeiros do vindeiro ano

O Concello de Boiro, a través do departamento de Servizos Sociais, vén de abrir o prazo de solicitude para programar actividades no marco do programa Boirenses Viaxeiros. Dende este departamento lembran que “este ano foron diversas as entidades sociais ou asociacións veciñais que realizaron actividades financiadas a través deste programa para persoas maiores”.

Os Servizos Sociais de Boiro, da man de Cruz Vermella, comezou neste ano a realizar saídas para que as persoas maiores visitasen outros lugares de Galicia. “Esta actividade tivo tanto éxito que outras asociación veciñais comezaron a planificar as súas excursións mediante o financiamento do transporte por parte do Concello de Boiro”, sinalou o concelleiro Raúl Treus, engadindo que entre as entidades que se implicaron na iniciativa atópanse a Asociación de Veciños de Lampón e a Asociación de Veciños de Abanqueiro, ás que se sumaron persoas usuarias dos obradoiros de memoria da Cruz Vermella nas distintas parroquias. Froito deste interese organizáronse viaxes a Ponte de Lima (Portugal), Ponteareas, Fisterra, Lugo ou Santiago de Compostela; así como a realización de etapas do Camiño A Orixe ou unha viaxe en catamarán en colaboración co departamento de Turismo.

Estas actividades promovidas polas asociacións súmanse a aquelas outras que organiza directamente o Concello de Boiro. “O que buscamos con estas actividades é potenciar un ocio activo entre os nosos maiores, ao mesmo tempo que visitan e coñecen lugares que moitos nunca tiveran oportunidade de coñecer”, afirmou o alcalde.

A partir do mes de decembro ábrese o prazo para que as entidades sociais e asociacións veciñais fagan as súas propostas e solicitudes de viaxes para o programa Boirenses Viaxeiros do ano 2023. As solicitudes deben facerse a través do Rexistro Xeral do Concello de Boiro empregando o modelo de instancia específico dispoñíbel na web municipal ou na portería da Casa Consistorial.