A Xunta de Galicia colabora na mellora das instalacións náuticas da Pobra do Caramiñal a través do Grupo de Acción Local do Sector Pesqueiro (GALP) Ría de Arousa, que permite a financiación de parte das obras de reforzo da seguridade e acondicionamento dos pantaláns recreativos con recursos do Fondo Europeo Marítimo Pesqueiro (FEMP). Así o subliñaron a presidenta de Portos de Galicia, Susana Lenguas, e a directora xeral de Desenvolvemento Pesqueiro, Susana Rodríguez, nunha visita ao porto deportivo da localidade para comprobar as obras que están en execución.
Os traballos que promove Muport -a entidade concesionaria do porto deportivo pobrense- consisten no acondicionamento e reforzo da seguridade dos pantaláns mediante a fixación de pilotes e a instalación de fingers. Isto permitirá mellorar as condicións de amarre da frota e busca minimizar o impacto do mar nas instalacións aboiantes, especialmente en condicións climatolóxicas adversas.
Estas melloras supoñen un impulso ao desenvolvemento turístico e económico da zona, o establecemento de sinerxías co conxunto do sector marítimo portuario e a xeración de emprego. En base a estes criterios o GALP financia con fondos europeos 170.000 dos 340.000 euros de investimento total da actuación.
Divulgación da náutica na escola
A presidenta de Portos de Galicia e a directora xeral de Desenvolvemento Pesqueiro puideron confirmar durante o seu encontro coa responsable de Muport o interese da entidade e sumarse ás iniciativas de divulgación da náutica entre os escolares.
Deste xeito, a Xunta de Galicia e Muport colaborarán para integrar a vela como actividade extraescolar nos centros da comarca de Barbanza impartida pola xestora do porto de Muros e A Pobra, seguindo o exemplo da iniciativa O Mar na escola que Cataventos realiza na Costa da Morte desde hai case dúas décadas.
