Rianxo oficializa este sábado o cambio do nome do complexo deportivo, que pasa a chamarse Pavillón Municipal José Manuel Abuín – Chema

Este sábado 8 de outubro está previsto formalizar en Rianxo o cambio de nome do Pavillón Municipal de Deportes, que pasará a chamarse Pavillón Municipal José Manuel Abuín – Chema, en base ao estipulado no acordo plenario da Corporación do 24 de febreiro deste ano e en recordo ao traballo municipal finado en 2020. José Manuel Abuín, Chema, desenvolveu durante mais de 25 anos os labores de conserxe en dita instalación, ademais de participar activamente no impulso e fortalecemento do deporte local desde o Club Voleibol Rianxo.

O acto celebrarase ás 16:30 h. no Pavillón e contará coa presencia de Adolfo Muíños, alcalde de Rianxo, Xusto Ordóñez, concelleiro de deportes, así como a familia de Chema, compañeiros de traballo, membros da Corporación, compoñentes do Club Voleibol Rianxo e outras entidades deportivas do Concello.
Co descubrimento do novo rótulo identificativo do complexo deportivo e dunha placa na súa lembranza no interior, darase paso a un encontro amigábel no que participarán deportistas, ex-deportistas e amigos do club de voleibol que compartiron con Chema moitos anos de proxectos e traballo.