O Concello de Noia fixo balance dos traballos que impulsou para rehabilitar e mellorar o Pavillóin Polideportivo Municipal Agustín Morís, unha intervención que segundo informaron fontes do Consistorio “entra na súa recta final para que axiña o complexo poida abrir de novo as súas portas”.
Con esta actuación incrementouse a superficie sobre os vestiarios cunha renovación que permite “un mellor aproveitamento do espazo e ampliación da grada, aumentando o aforo do recinto”, engadiu o Concello, facendo saber que de xeito paralelo conseguise crear novas zonas para o ximnasio, sala de prensa e palco de autoridades, “conformando un complexo deportivo de nivel acorde coas disciplinas deportivas e competicións que se desenvolven nas instalacións”.
Ademais, o compendio de obras recollen melloras na accesibilidade ao recinto, así como a instalación de portas de evacuación e a ampliación do recibidor de entrada.
Tras comprobar o avance das obras, o alcalde de Noia, Santiago Freire, destacou “a aposta en firme que este Goberno local está a facer polo deporte e polos deportistas de municipio, mellorando as infraestruturas para que poidan contar con equipamentos de primeiro nivel. Esperemos que este recinto abra moi pronto as súas portas e sexa un lugar de encontro e desfrute do deporte na nosa vila”. O primeiro edil recordou que as obras son froito da colaboración entre administracións, neste caso a Xunta, que aporta unha parte de financiamento a través da Secretaría Xeral para o Deporte.