O Grupo Municipal de Teatro de Ribeira (GMTR) dirixido por Oscar Romero, comezou a súa xira de outono representando o espectáculo O rei Telesforo busca noiva (e quere noivo) no Auditorio Mingos de Pita de Melide o pasado un de outubro. Abriuse con este espectáculo a X edición do Ciclo de Teatro Afeccionado (o ciclo O Teatro no Camiño), organizado pola Asociación Cultural Charamela e o Concello de Melide.
A agrupación ribeirense, formada por unha vintena de actores e actrices, visitará tamén o concello de Rois o vindeiro sábado vinte e dou de outubro no marco da Mostra de Teatro que organizan conxuntamente os concellos de Rois e Padrón; asemade actuará no Auditorio Municipal de Narón o domingo trece de novembro, no Auditorio Municipal de Rianxo o sábado 26 de novembro e no Coliseo Noela en Noia o sábado dez de decembro. Todas as actuacións serán co espectáculo de O rei Telesforo que fora estreado en decembro do ano pasado en Ribeira ao longo de tres días con cheos nas tres funcións.
A obra trátase dunha comedia de enredo, esperpéntica e en verso e ambientada na idade media, a través dun texto colectivo realizado polos propios compoñentes do grupo de teatro, cunha duración de 90 minutos e recomendada a partir de 16 anos. As actuacións tamén se atopan no circuíto da Rede Cultural da Deputación da Coruña e foron seleccionadas a través da mesma polos distintos concellos pero o grupo está en conversas tratando de pechar outras datas de cara á primavera para actuar en concellos como Teo, Vilagarcía ou Catoira.
