O legado de Alfonso Daniel Rodríguez Castelao perdura, mantense vivo e está máis vixente ca nunca: é un espello do que fomos e do que somos, e tamén do que seremos. Trátase ademais dun espello do inclusión, no que todas e todos estamos retratados. Esta é a cerna do espectáculo (Algunhas) Cousas de Castelao que segue a súa xira este outono por varios concellos da xeografía galega: o 7 de outubro no Auditorio de Val do Dubra, e o 26 na Casa da Cultura de Tordoia,
O espectáculo, abeirado ao programa de TeceRedes da Secretaría Xeral de Política Lingüística, nace da fusión entre o traballo que o actor Fran Rei vén desenvolvendo desde o ano 2017 no Obradoiro de Dramatización e Teatro da asociación Avante, dedicada ás persoas con diversidade funcional, e da súa propia experiencia previa na creación e produción da peza Retrincos de Castelao, de Culturactiva Producións.
A partir de textos do xenio de Rianxo procedentes de Cousas e Retrincos, actores e actrices con diversidade funcional comparten protagonismo cos profesionais Isabel Risco e Fran Rei, con quen poñen en escena unha proposta para todos os públicos.
