Este vindeiro domingo, día 09 de outubro, ás 11:00 h a coordinadora ambiental CEMMA organiza unha actividade formativo-divulgativa sobre a asistencia á fauna mariña ameazada, tartarugas e mamíferos mariños, na praia de Tanxil (Rianxo). O punto de encontro será o aparcamento. En caso de mal tempo a actividade será desenvolvida na Aula Activa do Mar.
Actividades ambientais de divulgación da Rede de Varamentos
A actividade enmárcase dentro da divulgación sobre a Rede de varamentos de Galicia que a CEMMA leva a cabo contando coa axuda da Deputación da Coruña para proxectos de actividades no ámbito do medio ambiente para 2022.
Simulacro de rescate
A actividade consiste en expoñer a presenza das especies obxectivo da asistencia en encallamentos, as diferencias básicas entre tartarugas (réptiles) e lobos mariños e cetáceos (mamíferos), así como o que podemos ou debemos facer para poder asistir en primeira instancia a un animal varado. O público obxectivo é xenérico aínda que tamén está destinado a membros de Protección Civil, Policía Local e especialistas de medio ambiente, así como aos compoñentes dos Grupos de Voluntariado de Cobertura da CEMMA, que son os grupos locais de apoio.
A coordinadora explica que as praias de Rianxo son espazos onde anualmente rexistran diversos varamentos de exemplares ao ano. O Concello de Rianxo e a Agrupación de Protección Civil local apoian a asistencia aos animais varados, en coordinación coa Unidade Móbil da CEMMA, permitindo a recollida de datos e mostras e coordinando a retirada dos exemplares.
Punto de encontro na praia de Tanxil: https://goo.gl/maps/Ds37AdL6RbCaX5vc9
