O BNG rexistrou iniciativas no Parlamento de Galiza e no Concello de Ribeira para “esixir a depuración de responsabilidades ante unhas verteduras ilegais producidas polo matadoiro municipal ribeirense”. A formación nacionalista informou de que lle chegaron vídeos e fotografías “nos que se poden apreciar verteduras de maneira incontrolada de augas residuais, sen ningún tipo de depuración, ao exterior do recinto”. En palabras do BNG, as imaxes e vídeos constatan que “esas verteduras non foron debidas a un accidente, xa que hai unha canalización rudimentaria para conducir eses residuos fóra das instalación do matadoiro”.
Nas imaxes e vídeos aprécianse regueiros de sangue e líquidos con alta carga orgánica que discorreron pendente abaixo filtrándose na terra e que mesmo poderían ter chegado a algún regato próximo, “co conseguinte risco para a saúde das persoas”, sinalan os nacionalistas, engadindo que van pedir a actuación dos gobernos local e galego, para que se abra unha investigación e “sexan depuradas todas as responsabilidades”.
Por outra banda, o BNG dixo ter constancia de queixas veciñais “polo trato que se lles dispensa aos animais que van ser sacrificados”. En opinión do grupo tanto a Xunta como o Concello deben actuar para “garantir que este tipo de feitos non se volven producir porque afectan gravemente ao medio mais tamén deben comprobar que se cumpre a lexislación vixente, con especial atención a aquela que regula o benestar animal e a depuración de residuos”.
