O BNG critica á Xunta pola demora ao presentar o recurso xudicial á UE polo veto ao arrastre

O BNG, a través da portavoz de pesca, a pobrense Rosa Pérez, esixiu á Xunta a presentación dun recurso xudicial á Unión Europea co “obxectivo de reverter a prohibición da pesca de arrastre para a flota galega”. Tamén animou aos gobernos galego e central a actuar contra as intencións da UE de prohibir a comercialización da quenlla, “da cal Galiza é a maior fornecedora no mercado europeo”.

A portavoz de Pesca, Rosana Pérez, recriminou á Consellería do Mar o que considera unha “demora” na presentación de accións “esenciais para protexer á xente do mar”, un sector que “vén de comprobar como “se despreza o seu papel por parte do PP”.  De feito, a deputada do BNG criticou aos populares por, nas súas palabras, “instalarse na inacción malia anunciar aos medios de comunicación da presentación dunhas accións xudiciais das cales o Parlamento aínda non foi informado”.

E engadiu: “Temos o dereito de ser informados todos os grupos deste Parlamento se queremos remar no mesmo rumbo para defender o sector pesqueiro”, dixo, e aproveitou para emprazar á Xunta a convocar “de xeito inmediato” o Consello Galego de Pesca.

A deputada do BNG alertou tamén das intencións da Unión Europea de restrinxir a comercialización da quenlla azul baixo o argumento do seu parecido visual con especies de escuálidos protexidos. Esta prohibición tería un “demoledor impacto para a frota galega”, dixo, apuntando que que a medida non se sustenta “en ningún informe ou avaliación científica, en ningún dos realizados indícase sobrepesca desta especie”, apuntou.

De feito, comentou, “a prohibición da pesca desta especie está levando á incerteza e a inquedanza á frota de palangre en superficie xa que Galiza aporta o 90% da produción europea de quenlla e entre o 60 e o 70% das capturas”. A flota galega, defendeu, “conta con máis de 120 buques e arredor de 1.000 tripulantes, cumpre co marco normativo e está sometida a uns estritos controis, polo que non pode verse exposta a decisións sen evidencias científicas.