O alcalde de Outes insta á Xunta a solucionar os problemas do transporte público para que Monbús cumpra cos servizos en Pontenafonso

O alcalde de Outes Manuel González López reclama a actuación da Xunta de Galicia para acabar cos problemas que a día de hoxe ten o transporte público porque é algo que está afectando a moita xente da súa localidade pero tamén de toda a bisbarra. González explica que os últimos problemas denunciados localízanse no lugar da Pontenafonso onde, segundo lle trasladaron os veciños, Monbús non está a cumprir coas frecuencias establecidas na concesión e que quedaran temporalmente en suspenso debido ás obras da ponte Nafonso.
Este feito, xunto cos xa denunciados anteriormente polo goberno outense como os problemas de horarios no transporte escolar ou a eliminacion de rutas de transporte compartido, están espertando o malestar de moitos veciños e veciñas. “Somos conscientes de que isto está minguando a posibilidade que teñen moitas persoas, sobre todo maiores, de se desprazar á Serra de Outes ou a Noia, imposibilitando que persoas maiores poidan acudir ao centro médico, concello, supermercado ou ao seu banco”. Desde o Concello de Outes reclaman a actuación da conselleira de Infraestruturas e Mobilidade para tratar de resolver esta situación de maneira inmediata.