Ecovidrio, a entidade sen ánimo de lucro encargada da xestión da reciclaxe dos residuos de envases de vidro en España, pon en marcha por oitavo ano consecutivo a campaña Recicla vidro por elas, iniciativa que ten como obxectivo “mobilizar á cidadanía a reciclar envases de vidro para coidar do medio ambiente e contribuír así á prevención do cancro de mama”. Desde este mércores 19 de outubro e durante as vindeiras semanas, un iglú rosa de recollida de vidro estará situado en Ribeira. A entidade transformará os envases depositados nos colectores nunha doazón á Fundación Sandra Ibarra.
Desta volta, a campaña estendeuse por máis de 170 cidades de todo o territorio estatal como Sevilla, Vigo, Coruña, Xixón, Oviedo, Valladolid, Zaragoza ou Logroño.
Así pois, Ecovidrio instalou 400 colectores rosas por toda a xeografía española.
Datos de reciclaxe de vidro en Ribeira
Segundo os últimos datos relativos a 2021, os habitantes de Ribeira reciclaron un total de 497,4 toneladas de envases de vidro, o que supón que cada cidadán reciclou de media 18,5 quilogramos. Respecto da taxa de contenerización, Ribeira sitúase cunha media de 193 habitantes por colector, contando cun total de 139 iglús para os residuos de envases de vidro instalados.
