Cultura de Dodro convoca unha nova edición do Mini-Premio Eusebio Lorenzo Baleirón

O Concello de Dodro convocou unha nova edición da réplica miúda e xuvenil do Premio Eusebio Lorenzo Baleirón, o Mini-Premio Eusebio Lorenzo Baleirón, dirixido neste caso ao alumnado da ESO e centrado en reivindicar, visualizar e recoñecer obras de foto-creación ou vídeo-creación.

Este concurso ten como obxectivos: promover a creación literaria, o uso da lingua galega e a creación artística entre a mocidade “que soña”, como diría o propio autor que dá nome a este certame.

A participación será individual, na modalidade de foto-creación (fotografía, debuxo ou pintura + poema ou relato) ou de vídeo-creación literaria (vídeo + poema ou relato), dúas novas linguaxes creativas nas que Cultura de Dodro quere poñer o foco, sobre a base de que “a linguaxe literaria debe adaptarse aos novos soportes de comunicación cos que actualmente convive a mocidade”.

As bases do premio poden consultarse na web municipal: www.dodro.gal. O prazo de presentación de creacións estará aberto até o 2 de decembro.