O Concello de Boiro vén de asinar convenios coas entidades sociais do municipio para o desenvolvemento de actividades para fomentar a inclusión. A contía destinada para o financiamento destas actividades por parte do Concello de Boiro ascende a 46.500 euros.
O alcalde, José Ramón Romero, e as persoas representantes de cada unha das entidades, asinaron esta mañá os convenios de colaboración. Son un total de seis as entidades beneficiarias destas axudas para distintos programas e actividades que levan a cabo en beneficio da veciñanza.
Ambar vai recibir un total de 4.000 euros para actividades de apoio á inclusión e transporte; Amicos 4.000 euros para a realización do Festirititi e transporte; A Creba, 1000 euros para transporte; Cáritas 8.500 euros para a cobertura de necesidades básicas de alimentación, roupa, medicamentos, material escolar, transporte e pago de honorarios a profesionais odontolóxicos, oftalmolóxicos, xuristas e psicólogos; 28.000 euros a Cruz Vermella para desenvolver as actividades do programa de memoria de maiores, o programa de apoio educativo a menores e o programa de biosaúde e paseos saudables; e 1000 euros a Renacer para charlas e intervencións en centros educativos para previr a drogadicción.
Durante a xuntanza, o alcalde e entidades realizaron unha posta en común das necesidades e demandas co obxectivo de seguir mellorando os servizos que se prestan dende as entidades e a colaboración do Concello.
