Este venres 7 de outubro comezaron os obradoiros de autocoidado organizados polo Concello de Ribeira e centrados en achegar recursos técnicas que favorezan o envellecemento activo e a calidade de vida entre a veciñanza. Comezaron na Aula do Maior da parroquia de Aguiño, coa presenza dunha quincena de persoas maiores recibindo formación sobre hábitos saudábeis. En total impartiranse 4 obradoiros, de dúas horas cada un, todos eles orientados a reducir na poboación o risco de padecer doenzas consecuencia da idade e que melloran o estado de ánimo e a autonomía dos maiores.
Os temas a tratar nestes obradoiros son, por unha parte a actividade física e a alimentación, como afectan ó estado de ánimo, á memoria e á calidade do sono, por outra, hábitos saudábeis para a prevención de síntomas do envellecemento e, por último, prevención de enfermidades. Os talleres constarán dunha parte teórica, seguido dunha práctica na que se demostrará a experiencia adquirida, e unha discusión sobre o tema impartido para rematar. Impartiranse ó longo deste curso 2022/23.
A relatora encargada da formación destas 15 persoas maiores é Ana Belén Crujeiras Martínez, bióloga pola Universidade de Santiago Compostela e doutora en Fisioloxía e alimentación pola Universidade de Navarra. Estivo presente na apertura dos obradoiros, o primeiro impartiuse o venres sete de outubro, acompañada do alcalde Manuel Ruiz e da concelleira de Servizos Sociais Ana Barreiro.
