O Parque Nacional das Illas Atlánticas de Galicia (PNMTIAG) xa está certificado como destino de ecoturismo, o que, segundo fixo saber a directora xeral de Patrimonio Natural, Belén do Campo, convérteo “no primeiro parque nacional de todo o país en obter este recoñecemento oficial ao seu traballo a prol da calidade e da sustentabilidade turística dentro das áreas e espazos naturais amparados por algún tipo de protección”.
Así o deu a coñecer esta semana no marco do VI Congreso Nacional de Ecoturismo, no que colabora a Xunta e que se celebra no Pazo de Mariñán da Deputación da Coruña, escenario escollido pola súa localización dentro da Reserva de Biosfera das Mariñas Coruñesas e Terras de Mandeo, que exerce de anfitrioa e foi o primeiro destino de ecoturismo certificado en Galicia.
Do Campo subliñou que o turismo sustentábel e responsábel é unha “peza clave” para o presente e o futuro dos territorios, tanto a nivel autonómico como local, “polo que os espazos naturais teñen que poñerse en valor e considerarse un valor engadido á hora de atraer un maior número de visitantes”, dixo, engadindo que Galicia “parte dunha posición de vantaxe xa que se trata dun dos lugares con máis biodiversidade en canto ao seu ecosistema e un dos destinos máis desexados para quen busca natureza, gastronomía e cultura”, aspectos cada vez máis valorados entre os turistas españois, tal e como indican os últimos datos recompilados polo Observatorio Nacional do Turismo, engadiu.
Tamén salientou as máis de 456.000 persoas que se achegaron ata setembro ao Parque Nacional das Illas Atlánticas, os case 50.000 visitantes que se estima que recibirán en 2022 os seis parques naturais da Comunidade, ou as 250.000 visitas que se rexistraron só este verán no Monumento Natural Praia das Catedrais, un “dos destinos estrela entre o turismo interior e nacional”.
