Este domingo, día 23 de outubro, ás 11:00 h a coordinadora CEMMA organiza unha actividade formativo-divulgativa sobre a asistencia á fauna mariña ameazada, tartarugas e mamíferos mariños, na praia dos Areos da Pobra do Caramiñal. O punto de encontro será o aparcamento. En caso de mal tempo a actividade será desenvolvida na Casa Mariñeira.
A actividade enmárcase dentro da divulgación sobre a Rede de Varamentos de Galicia que a CEMMA leva a cabo contando coa axuda da Deputación da Coruña para proxectos de actividades no ámbito do medio ambiente para 2022.
A actividade consiste en expoñer a presenza das especies obxectivo da asistencia en encallamentos, as diferencias básicas entre tartarugas (réptiles) e lobos mariños e cetáceos (mamíferos), así como o que podemos ou debemos facer para poder asistir en primeira instancia a un animal varado.
O público obxectivo é xenérico aínda que tamén está destinado a membros de protección civil, policía local e especialistas de medio ambiente, así como aos compoñentes dos Grupos de Voluntariado de Cobertura da CEMMA, que son os grupos locais de apoio.
A coordinadora explica que “as praias da Pobra do Caramiñal son espazos onde se rexistran diversos varamentos de exemplares ao ano”.
O Concello de A Pobra do Caramiñal e a Agrupación de Protección Civil local apoian a asistencia aos animais varados, en coordinación coa Unidade Móbil da CEMMA, permitindo a recollida de datos e mostras e coordinando a retirada dos exemplares.
