Cara ao festexo do Samaín, este 1 de novembro, a Concellaría da Igualdade da Pobra do Caramiñal dirixida por Charo Varela (Nós Pobra) ofrece obradoiros de conciliación no 31 de outubro por se tratar dun día non lectivo no actual curso escolar.
Destinados a crianzas da infantil e da primaria, terán como epicentro o CEP Salustiano Rey Eiras, en horario de 09.00 a 14.00 horas.
O prezo é de 3 euros por nena/neno, pero aplicarase un desconto do 50% á segunda irmá ou irmán e será de balde para o/a terceiro/a.
Para lles dar maiores facilidades ás familias usuarias tamén se lles proporciona o Servizo de Madruga e a prestación de comedor.
A data límite de inscrición estipúlase no 28 de outubro; trámite que se deberá formalizar no Departamento da Igualdade do Concello, no enderezo electrónico igualdade@apobra.gal ou no teléfono de contacto 981832764, marcando a extensión 6.
