A Pobra apoia o comercio local a través da conciliación e o espazo lúdico Pequetroula

A Concellaría da Promoción Económica da Pobra do Caramiñal lanzou este martes 4 de outubro unha nova campaña a través da cal fortalecer o sector comercial. A fórmula elixida será a da conciliación, contando coa colaboración do DEAN.shop eCommerce e da Asociación de Empresarios. Destes obxectivos e desas alianzas xorde unha nova edición da Pequetroula, un espazo lúdico para a rapazada de 3 a 14 anos en que se divertir mentres as súas familias realizan compras nos establecementos de proximidade.

No acto de presentación estiveron presentes o alcalde, Xosé Lois Piñeiro (Nós Pobra); a concelleira da Promoción Económica, Charo Varela (Nós Pobra); a técnica municipal desta área, Sara Sánchez; a presidenta do DEAN.shop eCommerce, Noelia Hermo; e a administrativa da Asociación de Empresarios, Susana Moreira.

A edil ratificou que se trata “dunha aposta importante que significa un compromiso co comercio local que nos leva a desfrutar de actividades moi dinámicas para a mocidade e crianzas, ademais de axudar ás familias a conciliar.” O rexedor, pola súa banda, referiuse á relevancia desta campaña que “evoluciona no seu funcionamento e medra ao estenderse dende outubro”.

O epicentro das actividades será a praza Alcalde Segundo Durán, onde estará habilitado un toldo que se converterá nun fervedoiro de actividades amenas e creativas: proxeccións de filmes, obradoiros de iniciación á maxia, cociña, ciencia, parkour ou contacontos son algunhas das propostas. Desenvolveranse durante as fins de semana comprendidas entre a de 8 de outubro e 18 de decembro, atendido por monitorado e especialistas en distintas materias. O horario definido para os sábados é de 11.30 a 14.00 e de 17.30 a 21.00 horas, mentres que nos domingos se establece dende as 12.00 ata as 14.30 horas.

Para acceder a este servizo é preciso presentar un bono Pequetroula que se pode conseguir en liña a través da web www.deanshop.es, a partir deste mesmo xoves, ou presencialmente na oficina do turismo, con atención ao público de luns a venres, de 09.30 a 14.30 horas. Tamén se habilita a posibilidade de facelo na propia praza media hora antes do inicio de cada sesión. Pode facer uso del tanto a veciñanza da localidade coma a doutros municipios.

Máis tarde, o bono poderase trocar por descontos en 36 comercios da vila que contarán cun distintivo: téxtil, moda deportiva, salóns de peiteado, centros de estética, tendas de tecnoloxía, mercerías, panadarías, tendas de comestibles e dous locais hostaleiros.

O prezo destes bonos por sesión distribúese da seguinte maneira: na quenda de mañá, 7 euros pola entrada dun/dunha cativo/cativa; pola tarde, 10 euros; e, coa opción de mañá e tarde, 15 euros. A contía total verase rebaixada pola participación de irmás e irmáns e será de balde para o/a terceiro/a.