Veciños e visitantes descobren este outono os tesouros de Outes nun programa de seis andainas

Este domingo 11 de setembro celebrouse a primeira das andainas organizadas polo Concello de Outes para achegar a veciños e residentes novas oportunidades de coñecer en persoa as importantes riquezas naturais, culturais e paisaxísticas do termo municipal.

Estamos a falar do programa de camiñadas colectivas Coñece o noso Patrimonio. A próxima xeira deportivo-cultural será o 25 de setembro. Na deste domingo participaron arredor de dúas ducias de persoas.

O programa inclúe andainas á Carleo pasando polo Cristo de Baneo (a deste domingo pasado), á Torre dos Mouros e as fervenzas de San Paio (este 25 de setembro con saída ás 9.00 dende a Igrexa de San Lourenzo), a San Tirso de Cando e á Catedral da Electricidade (o 9 de outubro saíndo da igrexa de San Tirso de Cando), ao punto orixinario do concello de Outes (o 23 de outubro, con saída da Eira do Carme, en Brión de Arriba), a Santa Lucía por Entíns (o día 6 de novembro con saída da Igrexa de Santa María de Entíns), e á Igrexa de Roo (o 20 de novembro).