Rianxo dá acollida en outono a un obradoiro de iniciación ao gravado

Rianxo vai acoller este outono un obradoiro Iniciación ao Gravado. A actividade ten o obxectivo de introducir aos asistentes nas metodoloxías básicas desta vertente artística (preparación de matriz, transferencia, entintado, etc.) en linogravado e punta seca. A persoa encargada de impartir os contidos será José Fernández Míguez. Trátase dun obradoiro para maiores de 16 anos, de 24 horas de duración. Celebrarase no baixo do Liceo, en horario de 10.00 a 13.00 horas, os sábados 15, 22 e 29 de outubro; e os días 5, 12, 19 e 26 de novembro e 3 de decembro. O número máximo de participantes será de 15. Trátase dunha actividade organizada dende Cultura de Rianxo en colaboración co Museo do Gravado e a Estampa Dixital de Artes (Ribeira). As inscricións están abertas até o 6 de outubro na web municipal.