A área de Cultura de Rianxo presentou os detalles das súas Aulas Socioculturais e de Ocio Educativo, concibidas como unha proposta de animación sociocultural, difusión da cultura popular e educación de adultos. A finalidade concreta é “promover e potenciar o desenvolvemento individual e colectivo da veciñanza adulta rianxeira a través da acción cultural socioeducativa”. Búscase tamén mellorar a calidade de vida da poboación, incrementar o seu acervo cultural persoal e comunitario e “ofrecer espazos de ocio creativo e mellorar as competencias e habilidades persoais e sociais”.
O prazo de inscrición dos obradoiros (un total de cinco) comeza o luns 26 de setembro no formulario que se habilitará no sitio web do Concello de Rianxo e remata o 6 de outubro ás 14.00. As admisións serán por rigorosa orde de inscrición.
Os obradoiros que se realizarán serán:
-Música Tradicional e Canto Coral.
-Cartón-Pedra.
-Iniciación ao Gravado.
-Escrita Creativa e Gravado.
-Descubrindo Arte Dramática: O Teatro.
