A Asociación de Empresarios de Ribeira presentou este 6 de setembro os detalles dunha campaña que coincide co reinicio da actividade escolar e que ten o obxectivo de achegar premios que nos axuden a suavizar a costa de setembro ao tempo que reivindicamos o comercio de proximidade neste punto de inflexión verán-outono. Estamos a falar da campaña Volta ao Cole, na que a asociación sorteará 400 euros durante o mes de setembro. Farao entre os tíckets rexistrados na web da patronal: 100 euros cada semana.
Nas bases especifícase que nos sorteos poderán participar “todos aqueles clientes que merquen ou consuman nos establecementos asociados dende o 6 até o 30 de setembro deste 2022”. Tamén se fai saber que o obxectivo fundamental da campaña é “incrementar as vendas e incentivar o consumo no pequeno comercio retallista de Ribeira”.
A promoción realizarase entre as compras e consumicións feitas desde o día 6 ó 30 de setembro de 2022. A forma de participar será mercando e consumindo en calquera establecemento socio e rexistrando o tícket de compra en www.empresariosriveira.com. Sortearanse, como dixemos, 400€ en vales de compra, do seguinte xeito:
-Un primeiro sorteo realizarase o 13 de setembro ás 09:00h entre os tíckets de compras feitas do 6 ao 12 de setembro. Sortearase dous vales de compra de 50€..
-Un segundo sorteo realizarase o 19 de setembro ás 09:00h entre os tíckets de compras feitas do 13 ao 18 de setembro. Sortearase dous vales de compra de 50€.
-Un terceiro sorteo realizarase o 26 de setembro ás 09:00h entre os tíckets de compras feitas do 19 ao 25 de setembro. Sortearanse dous vales de compra de 50€.
-Un cuarto sorteo realizarase o 3 de outubro ás 09:00h entre os tíckets de compras feitas do 26 ao 30 de setembro. Sortearanse dous vales de compra de 50€.
